Բարձրագույն խումբ. «Շիրակը» Երևանում հաղթեց «Արարատին» և հավասարվեց առաջատարին

Մեկնարկեց  ֆուտբոլի Հայաստանի  Բարձրագույն խմբի 25-րդ  տուրը։ Առաջին խաղում  Երևանի «Արարատը»  Ավանի  ֆուտբոլի ակադեմիայում  ընդունեց  չեմպիոնության համար պայքարող  Գյումրու «Շիրակին»։

Առաջին խաղակեսում  թիմերը  փոխանակվեցին  մեկական գոլով, նախ  24 —  րդ րոպեին  երևանցիների կազմում հաշիվը բացեց  Զավեն Բադոյանը, իսկ մեկ րոպե  անց  տուգանային գեղեցիկ  հարվածով «Շիրակի»  կազմում հաշիվը հավասարեցրեց Ժիրայր Մարգարյանը, 1։1։

Երկրորդ խաղակեսը անցավ հյուրերի տարածքային և խաղային բացահայտ  առավելությամբ, ինչի արդյունքում 55-րդ րոպեին Մորի Կոնեն առաջ մղեց «Շիրակին»  հաշվի մեջ, իսկ 84-րդ րոպեին նույն Մորի Կոնեն հաշիվը դարձրեց  1։3  իր հաշվին  արդեն դուբլ գրանցելով, իսկ մրցաշրջանում գոլերի  թիվը  հասցնելով 21-ի։ Խաղավարտից մի քանի վարկյան առաջ  Ժիրայր Մարգարյանը իր հաշվին դուբլ գրանցելով հաշիվը դարձրեց  էլ ավելի խոշոր, 1։4։

Այս  հաղթանակից հետո Վարդան Բիչախչյանի թիմը վաստակեց 45 միավոր և ժամանակավորապես գլխավորեց մրցաշարային աղյուսակը գործող  չեմպիոն «Արարատ-Արմենիայի»  հետ, ընդ որում գործող չեմպիոնը մեկ խաղ պակաս է  անցկացրել։  Երևանի «Արարատը» 33 միավորով եզրափակում է լավագույն վեցնյակը։