«Արսենալի» ճգնաժամը շարունակվում է, «Մանչեսթեր Սիթիի» կարևոր հաղթանակը

Անգլիայի առաջնության 14-րդ տուրի կենտրոնական խաղերից մեկում «Էվերթոնն» ընդունել է ճգնաժամի մեջ գտնվող «Արսենալին»: Լիվերպուլցիներն առավելության են հասել 2:1 հաշվով:  Բոլոր գոլերը գրանցվել են առաջին խաղակեսում: Ռոբ Հոլդինգի ինքնագոլից քիչ հետո «զինագործները» վաստակել են 11-մետրանոց հարվածի իրավունք, որը հստակորեն իրացրել է Նիկոլա Պեպեն: Այդուհանդերձ, հավասար հաշիվը կրկին կարճ է տևել: Ընդմիջումից առաջ Յերրի Մինան նորից առաջ է մղել տանտերերին:

Կառլո Անչելոտիի գլխավորած թիմը վաստակել է 26 միավոր և բարձրացել երկրորդ տեղ: «Արսենալն» ԱՊԼ-ում չի հաղթում արդեն 7 անընդմեջ խաղերում: Միկել Արտետայի թիմը  14 միավորով 15-րդ տեղում է:

Փոխարենը, հետզհետե մրցաշարային աղյուսակում բարձրանում է «Մանչեսթեր Սիթին», որն այսօր 1:0 հաշվով արտագնա հաղթանակի է հասել «Սաութհեմփթոնի» նկատմամբ: 16-րդ րոպեին Կևին դե Բրույնեի փոխանցումից հետո  միակ գոլը խփել է Ռահիմ Սթերլինգը:

Խոսեպ Գվարդիոլայի թիմը 23 միավորով վեցերորդ տեղում է,  իսկ «սրբերը» 24 միավորով նահանջեցին հինգերորդ հորիզոնական:

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով