Ծնվել եմ գեղասահորդների ընտանիքում, իմ կյանքը մանկուց կապված է եղել այս սպորտաձևի հետ. Սլավիկ Հայրապետյան

Sportx.am-ը զրուցել է երիտասարդ գեղասահորդ Սլավիկ Հայրապետյանի հետ, ով պատրաստվում է մասնակցել Մարտի 22-28-ը Շվեդիայում կայանալիք գեղասահքի աշխարհի առաջնությանը: 

Ինչպե՞ս և ինչո՞վ գրավեց այս մարզաձևը Ձեզ, ո՞ր տարիքից սկսեցիք զբաղվել

     Ես ծնվել եմ գեղասահորդների ընտանիքում: Իմ կյանքը մանկուց կապված է եղել այս սպորտաձևի հետ,  3,5 տարեկանից կանգնել եմ սառույցի վրա, բայց մարզվել սկսել եմ 10 տարեկանից՝ Մոսկվայում: Պատճառն այն էր, որ Հայաստանում իմ տարիքի միայն ես էի և պետք էր Հայաստանից ներկայացուցիչ լինի միջազգային մրցումներում: Հայաստանում մարզվելու պայմաններ չունենալու պատճառով մեկնեցի Մոսկվա, որտեղ հայրս մարզում էր եղբորս։

Ո՞րն է եղել Ձեր առաջին լուրջ ձեռքբերումը

      Առաջին ձեռքբերումներս 12-13 տարեկան հասկանում է եղել, երբ Մոսկվայում մրցումների ժամանակ կարողանում էի հաղթել իմ հասակակից տղաներին։

Նշեք ո՞րն է եղել Ձեր ամենատպավորիչ ելույթը

     Ամենատպավորիչ ելույթը ես կնշեմ Ձմեռային Ունիվերսիադան 2019թ. Կրասնոյարսկում: Շատ հաճելի էր, որ մեր հայ համայնքը կազմակերպել էր, ուպեսզի մրցաշարերին ներկա լինեն մեր հայ երեխաները և մեզ մրցումների ժամանակ ոգեշնչում  և ուժ էին տալիս։

 Կպատմե՞ք, թե ի՞նչ զգացողություններ ունեիք առաջին միջազգային մրցումների ելույթի ժամանակ

       Առաջին ելույթս եղել է 2006թ-ին, որին ես մասնակցեցի 10տ. հասակում: Չեմ հիշում այդ մրցումների ժամանակ ինչ էի զգում, քանի որ անցել է 14 տարի, բայց կասեմ, որ այդ մրցումերին գրավեցի վերջին տեղը, չիմանալով լավ սահել և թռչել: Սակայն այն ինձ մեծ ստիմուլ տվեց, որ պետք է ավելի լուրջ զբաղվեմ գեղահասքով և հաղթեմ բոլորին:

 Գիտեմ, որ Հունվարի 25-31-ը Զագրեբում պետք է կայանա «Եվրոպայի գեղասահքի առաջնությունը», իսկ Մարտի 22-28 Շվեդիայում տեղի կունենա «Գեղասահքի մեծահասակների աշխարհի առաջնությունը» մասնակցելու՞ եք արդյոք և ի՞նչ ակնկալիքներ ունեք այս մրցաշարերից

     Եվրոպայի առաջնությունը կորոնավիրուսի պատճառով չեղյալ է համարվել: Արդեն պատրաստվում ենք աշխարհի առաջնությանը և սպասում ենք միջազգային ֆեդերացիայի որոշմանը և մեծ հույս ունենք, որ փոփոխություններ չի լինի և առաջնությունը կկայանա:

Առաջիկա աշխարհի առաջնությանը Հայաստանից միայն դուք եք մասնակցելու, թե՞ այլ մասնակիցներ ևս կան

  Մասնակցելու ենք ես, Անաստասիա Գալուստյանը և Թինա ԿարապետյանՍիմոն Սենեկալ պարային զույգը:

Մեր երկրում Զարգացման ի՞նչ նախադրյալներ ունի գեղասահքը

         Գեղասահքը Հայաստանում դանդաղ, բայց զարգանում է: Այժմյան պայմաններում Հայաստանում ունենք երկու դպրոց, որոնք համապատասխանում են միջազգային ստանդարտներին, դա շատ մեծ աճ է մեր երկրի համար: Հուսով եմ, որ հետագայում ավելի ու ավելի շատ նոր գեղասահորդներ կներկայացնեն մեր երկիրը միջազգային ասպարեզում:

Շնորհակալ եմ հարցազրույցի համար, Ձեզ հաջողություն եմ մաղթում առաջիկա առաջնությունում․

Ես ևս շնորհակալ եմ․

Հեղ. Գոհար Նավասարդյան

Սլավիկ Հայրապետյանի տպավորիչ ելույթներից մեկի տեսանյութը․

 

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով